اساسيات الميك اب للمبتدئات

السلام عليكم ورحمة الله وبركاته 

اساسيات الميك اب للمبتدئات :

ننزل للسوق نبغى نشتري ميك اب في نفس الوقت بسعر معقول ونتيجة مرضيه ..

انا من نظري اساس الميك اب عندي ( فاونديشن،كونسيلر،ماسكرا،ايلاينر،روج،بلاشر)

الكونتور والهايلات مسكرة الحاجب والاي شدو خيار مفتوح نقدر نستغني عنه او نستعمله

 ١(اول شيء الفاونديشن وانواعه) :

فيه فاونديشن لكويد (سائل) ، فاونديشن صلب ( يجي على شكل قلم ) ، او بودرة مضغوطه ، او بيبي كريم

انا شخصيا ولو تسئلوني ايش المحبب والافضل عندي الفاونديشن السائل ليه ؟

لانه تركيبته من مارمه لماركه تختلف فيه اللي يجي نوع مات ويناسب اللي يحبو اللوك المات

وفيه اللي يجي قلوي ( يعطي لمعه صحيه ) وهذا اللي احبه انا

غير كذا سهل يتحكمو فيه اصحاب البشرات الدهنيه ببودرة تثبيت او ازالة لمعان !!

نجي للحين لاحب الفاونديشنات المحببه لقلبي من الدرق ستور :

الآول والافضل لبشرتي مايبلين فيت مي 

 

احبه بشكل ماتتصورونه لاسباب كثيره :

١- يناشب البشره العادي للمختلطه والانب للبشرات الجافه صديقهم المفضل

٢- قوامه سائل وخفيف مايكتم البشره ابدا وتغطيته متوسطه وهذا شي فضيع وفيه نسبة حماية ١٨ 

٣- مره سهل فالدمج مايتجمع بمكان معين اويعطي البشره شكل كيكي ( كانه بالوجه طحين )

السؤال الاهم ( غادة ليه مانصحتي بيبي كريم ) ؟

البيبي كريم من نظرتي الشخصيه ماراح يرضي غير اللي بشراتهم خاليه من العيوب حتى الهالات 

هل معناته هذا لازم نستخدم فاونديشن اقوى كل يوم ومايتعب بشرتنا ؟

لا طبعا بس فيه انواع من الفوانديشنات تلاقو ورا مكتوب كلمة teinte تنت 

التنت اللي يجي مكوناته غالبا مخففه ونسبة السوائل فيه اكثر فا يكون خفيف وفيه نسبة لون مرضية 

زي الحبيب حقي فيت مي عشان كذا قلتلكم احبه لانو يعتبر مره خفيف زيه زي البيبي كريم تقريبا ..

سعره ٧٠ وحولها 

طيب بشرتنا ماتنضر منه كل يوم ؟

انا دايم اقول الضرر اساسه اهمال يعني حتى البيبي كريم لو تحطيه بوجهك ماتمسحيه وتنامي فيه

يوم مع يوم مع السنين ببشرتكم تتعب وتصير رقيقه يعني اهم شيء عنايتكم 

ترجعو للبيت تغسلو وجهكم بذمه وضمير وترطبو عشان مانشيل هم الضرر

نوع ثاني نفس مواصفات فيت ميبلين بس للبشرات المختلطه والدهنيه ؟

المرتبه الاولى والحب الاغلب لكل البنات هيثلي ميكس من برجوا 

نفسه نفس مواصفات حق ميبلين بس من تجربتي هيلثي ميكس مع الوقت يميل على بودره اكثر

عشان كذا اقول يناسب المختلطه والدهنيه اكثر

سعره ٩٠ وحولها

معلومه :

صاحبات البشره الدهنيه والمختلطه ضروري عشان اي فاونديشن ما يخطط معكم او يدهن 

استعمالكم لبودرة التثبيت خيار مهم والبرايمر قبل الفاونديشن

( ماقد جربت بودرة تثبيت عشان اقدر ارشح لكم مع الاسف )

٢ ( البرايمر ) 

البرايمر ينحط قبل الفاونديشن عشان يعبي الخطوط التعبيره بالوجه اللي حول الفم 

ويخفي اتساع المسامات ويثبت الفاونديشن لمدة اطول 

 البرايمر خيار وليس اساس بس لاني متاكدة كثير بيسألني عن البرايمر 

انا جربت ثلاث انواع ( بروفيشنال من بينفت ، لورريال ماجيك ، وبرايمر من ماركة دييقو )

بروفيشنال من بينفت لقيت له بديل ارخص بكثير ويسوي نفس الوظيفه 

اللي هو هذا من لوريال قوامه كذا زي السيلكون مخملي يناسب اللي مسامهم واسعه

اما انا شخصيا بالنسبه الافضل للابد برايمر دييقو بالما بس سعره يعتبر غالي 

لانه قوامه زي الكريم ووظايفه اللي يسويها اكثر 

سعره ٦٠ او ٧٠ ناسيه

٣ ( ماسكرا وكونسيلر )

الماسكرا مستحيل اقدر انصحكم بنوع معين وهذا صعب 

لانو المسكرا نتيجتها من عين لعين غير وكثافة الرموش من شخص لشخص تختلف !!

وانا من النوع اللي احب اعطي رموشي شكل دراما وكثافه اكثر 

ماتستهويني ماسكرا التطويل او العكف واذا تعرفوني دايم اسب ماسكرا 

ذا ريل من بنفت مع انه الكل يمدحها ؟ لانو انا رموشي ماتحتاج تطويل انا ابغى كثافه

فا شوفو احتياجاتكم واشترو الماسكرا على هالاساس مو عشان الكل مدحها !!

وبرضو يحقلكم تجربو المسكره فالمحل وهذا افضل عشان تشوفو النتيجه بعينكم

عاليمين افضل مسكره بالنسبه لي من الدرق ستور لوريال فولوم ميليون لاشيز سعرها ٨٠

واللي جنبه كونسيلر فيت مي من ميبلين حلو لا باس يقوم بالواجب للي ماعندهم ميزانيه  سعره ٦٠

* الكونسيلر وانا مغمضه بدون تكثير كلام الافضل للابد المؤب برو لونق وير من ماك 

احط فيه ١٢٠ ريال وانا مغمضه ويستاهلها بمعني الكلمه !!!

تغطيه عاليه جدا جدا ، يعطي منظر صحي لمنطقة الهالات ، مايخطط معي ابدا وعندي درجتين منه

ان سي ٣٠ وان سي ٣٥ اخلطهم مع بعض يعطوني لوني المناسب

٤ ( مسكرة الحواجب )

الحواجب ماراح اتعمق فيها الحين لانو بنزول تدوينه بعد هاذي كل شيء يتعلق بالحواجب 

بس بالنسبه لانو شعر حاجبي كثيف ويحتاجله بس تعبئه وتثبيت 

هذولا افضل شيء لحواجبي ماسكرا ريفلون للحواجب درجتي دارك براون

واحب ادخل فرشة المسكرة بجل التثبيت من اتش اند ام وارجع احطها بعلبة المسكره 

يصير كذا لون وجل تثبيت بالمسكرة وامررها على حاجبي جدا احبها وتفي بالغرض !!

سعر الجل ٣٠ والماسكرا اعتقد ٧٠

( خيار وليست اساس الماسكرا للحواجب )

٥ ( الاي لاينر )

الاي لاينر انواع : سائل وجل والسائل له فرشتين ثابته ومتحركه 

الفرشه المتحركة زي ايلاينر محمود سعود 

والفرشة الثابته والاسهل اللي انا استعملها من مكياجي 

جدا احبه الايلاينر هذا يمكن الشيء الوحيد الحلو بمكياجي لول  وناسيه سعره !

سواده حلو وثابت ولاهو اللي يتعب بالرسم والمسح استغرب من اللي يحبو محمود سعيد !

ساىل مره يحوس الدنيا عليه وفرشتها اجلس انتفض سنه فالنهايه اسوي شكل امواج بعيني مو خط

واللي يقهر اكثر واكثر انه سواده يقلب على رمادي :/

اما بالنسبه للايلاينر الجل ماقد جربت لانو صعب ويبغاله يدي شوي حريفه ..

بس بكذا انا ذكرت لكم الاساسيات اللي المفروض تشترونها أول 

بالسنبه للكنتور الهايلايت الاي شادو هاذي خيارات مفتوحه لكم لو عندكم استفسار حولها 

او اذكرلكم نوع مفضل عندي منها اسئلوني وباذن الله راح اجاوب

احبكم