النظافه الشخصية ( بعض النصائح ) + مسك الطاهره !

السلام عليكم ورحمة الله وبركاته 

النظافه الشخصية ..

الكلام اللي باكتبه الحين مايحتاج دراسه وبحوث علميه ولاهو اختراع اغلبنا نعرفه بس حبيت اركز عليه 

اغلب البنات النظافه الشخصية تحصرها عالجسم والملابس فقط ماتدري انه فيه اشياء ادهى منهم !!

نبدا من اعلاها واللي هي فروة الرآس :

حسبالكم راسكم مايطلع ريحه مخيسه ؟ لا والله انه يطلع من فروة الراس ريحة تذبح الفار ، ليه ؟

تراكم الدهون والزيوت فالفروة اسبابها / الترويش القليل بس مو معناته يوميا تغسلو فروة راسكم غلط !!!!

فروة الرآس الدهنية صعبه جدا جدا التعامل معها لاني انا وحده من صاحبات الفروه الدهنيه

اتروش يوم ويوم لا زمان كنت يوميا اتروش اعدمت شعري وتساقط الحين اكتفيت بالشامبو الجاف فاليوم الثاني اللي ماتروش فيه

اما بالنسبه للي مره دهنيه مهما يتروشون فيه في محل ايف روشيه شامبو للفروه الدهنيه ينظفها ويخففها جدا فضيع عن تجربه

هو وخل الرمان او التوت ناسيه من نفس المحل استعملهم مره وحده فالويكيند ينظفو فروة راسي زين ..

زي ماقلت نظافه الراس والشعر مره مهم صدقوني كثير اجلس جنبهم بس تتحرك ريحة فروة راسها تدخل بالنخاع !

الوجه :

اعتقد تعبت وانا اعيد واكرر واقول لازم ضروري يكون عندكم روتين يومي لوجهكم

حرام حتى وجهك يدل على نظافتك بنفسك مهما تحطين اطنان ميك اذا اساس بشرتك مزيت ومحبوب ومهملته ماراح يفيد

اول ماتصحون تستعملو الغسول المحبب لكم والمناسب لبشرتكم + تونر او موية ورد تمرروها بقطنه على وجهكم 

تنظف وتنور الوجه تقفل مسام وجهكم وتصغرها + مرطب لوجهك واذا طالعه مشوار استبدلي المرطب بواقي شمس !

برضو اذا رجعتو من الدوام او حتى اذا ماكان عندك دوام قبل النوم تمسحي وجهك بتنور وترطبيه واشربي مويه 

صدقوني كل هالاشياء مع الاستمرار مستحيل يمر شهرين مايبان لكم فرق مستحيل !!

الفم :

الغالب يكتفي بتفريش الاسنان اعتقدا هذا الشي راح يمنع الرائحه الكريهه ، غللللط !!

ان كانك توك صاحيه لازم تفكين ريقك بشي اكسري اي بسكوت او اي عصير اشربيه فكي ريقك فيه

شفايدة انظف الاسنان وانا ريقي ناشف وبطني فاضي النفس مايطلع من السنون والله !!

كلو اي سناك تحبوه خفيف تروقون فيه وفرشو اسنانكم زين واتحدى ابن امه يشم بفمكم شيء !!

الجسم بشكل عام من الرقبه للارجل :

معلومات غلط عندنا ( اللي بنية جسمه دب ريحتهم دايم شنيعه ، اي احد تحت الاندر ارمز عرق ريحته مقرفه والخ .. )

من وين جايبين هالمعتقدات الغريبه ؟؟؟؟

انا كنت بنادي مدة ٥ شهور وخالطت الحريم والبنات السمان والنحاف 

تعرفون بالنادي نطلع من التمارين عرق وحالتنا حاله ومن كلاس تمرين للكلاس الثاني 

ياكثثثثر اللي تكون ملابسهم معرقه مع ذلك قسم بالله انو تكون جنبي وتسولف معي ما اشم اي ريحه فيها ابد !!

عارفين ليه ؟ الملابس اللي نلبسها لازم وضروري تخلصين ترمينها بالغساله تتنظف 

السروال الداخلي كل ثلاث ساعات اقصى حد تغيرينه ويفضل يكون اختياركم للاشياء الداخليه قطن طبيعي 

القطن الطبيعي مايمتص الروائح ويجمعها ولا يسبب حكه فا هذا شيء حلو 

برضو شيء حلو اذ اخذتو شاور تستعملو شاور جلو يعطي انتعاش عالصبح وباي وقت

مزيل العرق مزيل العرق مزيل العرق !!!!

مره كنت عند دكتورة جلدية تشيك على ذراعي كنت اعالج التصبغات اللي فيها 

دخلتت عليها كانت مصدومه تقول المريضه اللي قبلي جايه تشتكي انو تستعمل مزيل عرق مع ذلك ماتروح الريحه ليه !

لانو اغلب الناس تستعمل المزيل مره وحده فاليوم قبل تغيير الملابس واعتقادا انه بيدوم معاه ٢٤ ساعه ، غلللط !!

اول ما اصحى من النوم يوميا قبل الدوام ضروري اروش جسمي وادهنه واستعمل مزيل رائحه العرق

وبس ارجع من الدوام استخدم مزيل رائحه العرق اللي يجي شكل بخاخ ارجع ابخ من مسافه بعيده شوي بس

يمتص اي شي ممكن طلع مني ويثبت المنطقه نظيفه لوقت اطول 

يعني مو معقول تستعملون المزيل الصبح ويجي الظهر والعصر تعرقون وتقولون يطلع ريحه لازم تجددي تنظيف المكان !!

والله يرضى عليكم حبيباتي ركزو فيه فرق بين ( مزيل عرق ) و ( مزيل رائحة عرق ) 

تتوقعو فيه شيء يزيل العرق ؟ لا طبعا اصلا العرق شي مهم بالجسم ينظف الجسم من داخل كيف نزيله ونمنعه !

وغالبا مزيلات العرق تجي على شكل كريم قاسي ما افضله كثير لانه يكتم المنطقه ويحذرو دكاتره كثير من مزيلات العرق

مزيل عرق بيزلين بالياسمين مكتوب عليه ( مزيل رائحه العرق ) وسائل ولا له ريحه ولا يسبب سمار عن تجربه

احبه وبس يخلص ارجع اشتريه سعره ٤٠ او ٦٠ ناسيه واشتهر عاساس يفتح المنطقه خراط ماسوا لي شي !

اللوشن + العطور بشكل عام :

دايم اذا رطبتو جسمكم بعدها بخمس دقائق هذا افضل وقت تعطرو جسمكم فيه لانه نظيف ومترطب تمسك الريحه بجسمكم

وركزو علي اماكن النبض اللي هي تحت الكفين عن العروق واسفل الاذن هاذي الاماكن لو تكتفي بمسك روز او ابيض

صدقيني كل من يمر عندك يحس بريحه نظافه طالعه منك وتدوم وقت حلو لو مو من اصحاب المسك انتي 

تقتدري تكتفي ببخاخ الجسم او العطر حقك بس بليز بليز بنات ارحمونا من حركة ابخ العطر برقبتي من قرب !

مضره وتسمر بالرقبه وفوقها العطر يتركز بمنطقه وحده ولا انتشر فا يعكس الريحه خياس !!

برضو فيه بنات اذا طلعو بالجمس ودخلو بمكان بارد او عرقو يبخو عطر اكثر باعتقاد انه العطر بيوخر هالشيء !

يعني انتي معرقه وفوقها بمش حارقه تقومين تبخين عطر تضرب الروائح مع بعض بتطلع ريحة شيء مصدي مايفيد !

مسك الطهاره ( المسك الاسود ) :

هذا اخر شيء باحكي عنه بما انه كثير منكم طلبني احكي عنه وطريقة استعماله 

مسك الطهاره اول شيء اذا بتشترونه لاتفكرون تاخذونه غير عن عبدالصمد القرشي ..
ويناسب البنات والمتزوجات من قال مايناسب البنات ؟ بس البنات استعماله مسح خارجي فقط

فوائده : يمتص الروائح الكريهه ، يقلل من الافرازات الطبيعيه اللي عند كل البنات ، ويخفف من الحكه 

كثير بنات يقولو ريحته شينه لانو يشمونه من العلبه !

على فكره هو وظيفته نظافه مو عشان يعطر المنطقه تخيلي تعطري مكان مكتوم ياعيني عالمصايب !!

طريقة استعماله بسيطه : قطنه مبلله بشوي مويه وامسحي المسك بالقطنه مره وحده

مرري القطنه بشكل طبيعي ومسح خارجي عالمنطقه ويلك ثم ويلك تتعمقين ان كانك بنت اما المتزوجات ماعرف !

ومو كل يوم نستعمله !! ، لانه قوي فا دايم نمشي على نصيحة الرسول بعد كل ماتنتهي الدوره الشهريه نستعمله 

سعر التوله الصغيره مره : ٢٥٠ ، الوسط : ٤٠٠ او ٥٠٠ ناسيه ، الكبيره : ١٠٥٠

وبس هذا كل شيء ، ارجع واعيد كل هالاشياء اكيد نعرفها بس كتبتها للي طلبوني واصحح معلومات خاطئه

♥♥