حب الشباب واثاره وبقع الجلد + تجربتي مع منتجات janssen

السلام عليكم ورحمة الله وبركاته 

اثار حب و حبوب بالوجه و بقع وتصبغات وجه 

باذن الله كلها بتكون عنها تدوينة اليوم حاولو تقرو التدوينه وانتو مروقين عشان تستوعبو وش اكتب ..

بس خلونا اول شيء نقسم التدوينه راح ابدا في :

١- تجربتي مع منتجات جانسن وكيف عالجت البقع اللي بوجهي 

٢- حلول فعاله لمحاربه حب الشباب وتخفيف اثار الحبوب بشكل فعال

٣- اشياء نسويها تدمر بشرتنا بدون مانحس + نصائح !!!

بسم الله 

تارارارا هههههههه ايه هذا وجهي مو دعايه مو فوتوشوب مو شيء 

تذكرون يوم سافرت قطر ؟

من هنا انعدم وجهي انا بشرة وجهي ماتستحمل الحراره بجميع اشكالها ، كيف ؟

يعني اشعة الشمس المويه الحاره المويه المالحه كلها هاذي لها اثار جانبيه على بشرتي 

اما تسبب لي حكه وينتج عن الحكه جروح وجفاف وطبعا الجفاف يسبب تبقع زي ما انتو شايفين بوجهي

او انها تسبب لي حروق بس حرق سطحي يعني بشرة وجهي محترقه ماقدر احط اي شيء عليها يحرقني

...

ايش اللي صار ؟ باختصر القصه انه ركبت البنانا بقطر اذا تذكرون والعامل طيحنا فالبحر ..

بحر يعني ملح وملح يعني اكبر عدو لبشرة وجهي :( !!

اول ماطلعت من البحر ورحت الفندق وجهي شبه رمادي اشحب مخيف يجيب قطعة الرزق ههههه :(

استهونت بالموضوع قلت يمكن البحر جفف وجهي عشان كذا شاحب وجلست اكتفي بمرطب عادي

انا اصلا بشرة وجهي احترقت وصارت المنطقه اللي حول خدي وعيني جااافه وتحرقني بشكل مو طبيعي

وكل ماحطيت كريم حرقني اكثر واكتشفت من الذكاء فيني انه في كل مره ادهنها وجهي يحمر اكثر 

الين شوفت عيونكم !! صار الحمار بقعه كبيره تفجع :( 

# الغلط راكبني مليون فالميه لانه ماعطيت المسأله اهتمام وفوق كل هذا ماخذت معاي كريمات طبيه

بالسفره غير واقي شمس والادهى !!! كنت اكمل واحط ميك اب مادري وش العباطه اللي كانت فيني :(

وهذا كل شيء ليه علمتكم بكل السالفه وهي ممكن بنظركم مو مهمه !!

لانه لو ماعرفت اغلاطي ماكان تعالج وجهي !!

وش حل مشكلة الحرق والبقع اللي جتني هنا :

١- وقفت كككككللل شيء ماستخدم لاغسول لامقشر ولاشيء 

٢- جلست اجرب اشياء تخفف علي حرارة وجهي اللي هي :

( موية ورد + كريم فوسيدين او ثلاثه ايام بس + كريم ارسلته لي تاجرة من ماركة جانسن )

جديا تعبت تعبت هذيك الفتره احاول بس القى شيء اتدهن فيه احس وجهي بينقطع من كثر الجفاف والحراره

كان الروتين كذا :

اول ماصحى ابخ موية ورد بوجهي اخليها ٥ دقائق الين تجف 

وادهن وجهي بكريم فوسيدين اول ما اصحى وقبل لا انام 

جلست كذا لمدة ثلاث ايام بعدين ترا قلت يالله اجرب كريم يمكن خفت حرارة بشرتي

وفعلا على طول استعملت الكريم اللي ارسلته لي التاجرة هذا شكله :

خلوني اقولكم وظيفة المنتج بشكل مختصر :

١- تجديد خلايا 

٢- تحفيز الكولاجين

٣- محاربة الجفاف وتصفية البشره

٤- ترطيب البشره بشكل ناعم وسلس 

كل كلمة كاتبينها فالبرشور اللي جا مع الكريم فعلا شفت تاثيره ببشرتي !!!

ما انكر اول مافتحت الكريم وشميت ريحة ورد خفيفه خفت قلت مو معقوله معطر وباحطها بوجهي ؟

اخذت نقطه منه وحطيتها على مكان بسيط بوجهي باشوف هل باحس بحراره او لا ..

صدمني هالكريم من جميع الجهات انه ماتحسست منه وغير كذا ملمسه ناعم يعني تحسو قوامه خفيف

لاكن وربي مسحه باصبعي بس كنت اخذ من العلبه كانت ترطب وجهي ترطيب جباااار !!

وعشان اكون صادقه معكم وقتها ماكنت ادور نتايج ابغى بس ارطب وجهي احساس الجفاف كان يذبحني

ابدا ابدا ماكنت متأمله منه الكثير مع ذلك كنت بين فتر وفتره اصور وجهي عشان اتذكر وجهي قبل 

هههههههههه وربي انه انا زيكم مصدومه من الصور اطالع واقول مستحيل فيه شيء مو طبيعي 

الكل لاحظ بوجهي فرق حتى صديقتي تذكر وجهي يوم رجعت من قطر محروق 

بعدها بشهر تقولي غادة وجهك منور صحيح فيك حبوب بس وجهك نظيف منور 

وصرت عليه يوميا مره اول ما اصحى ومره قبل النوم بسسسس !!!

مو ترا لوحده ومن نفسه جاب مفعول انا ساعدت الكريم ياخذ مفعوله 

شهر حرمت نفسي الميك اب + ٧٠٪ بالميه كنت احاول الشمس ماتجي لوجهي + المويه مو بس كنت اشربها 

الا ابلعها بلللع خلاص ضيق صدري وجهي 

وفعلا وقفت عن كل شيء يضر بوجهي واستعنت باشياء تعالجها بس لازم تتذكرون انه باول ثلاث ايام انام واصحى

عالفيوسدين برضو هذا شيء مهم !!!

سعر الكريم ٢٥٠ اعتقد بس وربي حلال حلال كل ريال فيه صدقوني :(

+

عشان ماكل حق التاجرة ربي يسعدها ارسلت لي ولامي كبسولات ثانيه قالت حلوه بتعجكم

وكانها كانت حاسه انه بشرتي بتموت جفاف ههههه :(

المنتج هذا عباره عن كبسولات ترطب سطح البشره وتخليه نااااعم وندي كانه ملمس جلدك لين

احبه قبل الميك اب احطه ينعم بشرتي ويخلي ملمسها ناعم  ويخفف الخطوط التعبيريه 

كم سعره صراحه ماعرف قلت اقوله للفائدة يمكن احد يحتاج هالمواصفات فالمنتج 

الحين الجزء الثاني حبوب الوجه واثارها وكيف نتعامل معها :

١- نحاول نعرف سبب ظهور الحبه اذا كان من منتج معين نوقفه ان كان من طبيعة حياة نحاول نصححها

٢-مانلمسها ابببببدددددا لمس حتى لمس لاتلمسين 

٣- نعرف نوع الحبه ونبدا نعالجها 

الحبوب اشكال باختصرها بثلاث انواع ملاحظه علينا كثير :

١- حبوب صغيره تحت الجلد

٢- حبه وداخلها دهن ووصخ اللي تنفقع من نفسها لاحظو مو انتو تفقعونها !!

٣- حبوب حمرا ناتجه عن حساسيه من شيء معين 

كل هالثلاث انواع فيه كريمات تحله بس يبغالها طولت بال وانتظام :

١- جل ديفرين :

بنات هالجل خيال عجيب فعال بس انتو استعملوه صح وبتشوفو بعينكم النتائج !!!

الحبه الحمرا اللي عندك مورمه وفيه باقي اثر حبه خذي نتفه من الجل وادهني منطقه الحبه او اثرها 

يوميا قبل النوم طبقي هالشي ويفضل قبل النوم عشان مايتفاعل مع النور بنفس الوقت 

يتقشر الحبه واثرها وانتي نايمه يتحفز الكولاجين ويتجدد سطح البشره يعني اثنين في واحد تقشري وتجددي

( ماينحط او يدهن على كامل البشره انتبهههوووا )

ترا يعتبر جل مقشر يعني راح يسببلك قشور ويقشر ببشرتك

سعره مايتعدى ٢٠

٢- كريم فيوسدين او ابو اسد :

اللي في صوره عندي خط احمر واصفر انتو خذو اللي خط احمر بس 

ثلاث ايام فقط لاتكثرو منه لانه كله كورتزيون يعني استعماله بزياده بيقلب ضدك 

يخفف كثثثثييير تورم الحبوب ويمنع انه البشره تطلع حبوب زياده 

احس ضروري يكون عند كل بنت يفك ازمه 

سعره ٣٥ تقريبا 

٣- منتجات ال tea tree بجميع اشكالها وانواعها :

شجرة الشاي اكثر مكون فعال ومحارب لحباب الشباب ١٠٠٪

مافيه ماركه الا ولازم عندها خط كامل لشجرة الشاي 

منهم ( كيلز ، ذي بودي شوب ، لشّ ، ... )

منتجين جربتهم اقدر اقولكم خذوهم وانتو مغمضين متاكدة بيعجبوكم 

القلم اللي بالصوره من صيدلية بوتس سعره ٢٧ 

فضييييع لتجفيف الحبوب وتخفيف الحمار !!!

يجي على شكل قلوس او قلم الراس الشفاف استخدام يومي وباي وقت 

الجزء الثاني مكتوب عليه نايت ينحط عالحبه قبل النوم 

رخيص ويستاهل تجربوه صدقوني 

ثاني منتج اللي هو البخاخ التونر من لشّ 

يجنن بنات يخفف ظهور الحبوب ينظف المسام وينور الوجه 

سعره ٦٠ 

الحين اخر فقره باوريكم اكثر اشياء تضر بشرتنا بدون مانحس ولازم نخففها :

نور الاجهزه سواء لاب توب جوال نحاول نخفضها ولا نوجهها علينا بمكان مظلم 

تسبب شحوب للوجه وذبلان 

اليدين !!

شوفي كم شغله نلمسها باليوم وكم بكتيريا ضاره بيدنا 

وكم مره نلمس وجههنا ونمغط فيها ونضغط فيه كل هذا يمر المسام والوجه

المخده ..

يوميا ننام عليها ويوميا نحط وجهنا عليها يعني !!

فوق انه لازم ننظف لحاف المخده اقلها كل ثلاث اسابيع 

لاحظو انه كل الرواسب اللي بجهكم تمتصه مخدتك سواء من دهون من وصخ والخ

ضروري ننتبه لتنظيف لحاف او غطاء المخده 

اسوء شي :( البيوتي بليندر وفرش الميك اب بشكل عام

اكثر شي يطلعولي حبوب اذا اهملتها بالذات هالاسفنجه :(

انتبهو للاشياء الي انتي جالسين تخلوها تلمس بشرتكم 

كثيير كثثير اشياء بسيطه نسويها تفيد بشرتنا بنفس الوقت منها اللي يضر بشرتنا 

فا دايم شوفي اللي يناسبك واستخدميه وابعدي عن الاشياء اللي تضر بشرتك 

اتمنى انه مانسيت شيء تعبت وانا اكتبت فا ياليت لو نسيت شيء تنبهوني :(