صبغة النيسكافية

السلام عليكم ورحمة الله وبركاته

تدوينة اليوم على كثر طلبكم لها راح اكتب كل تجربتي مع صبغة النيسكافيه بس قبلها 

نقطه مهمه ( النتائج غالبا تختلف من فروة لفروة اللهم ابريت ذمتي )

المكونات :

نيسكافيه ، كركم حق جسم او اكل مادري طلبته من البقاله وجاني مطحون ، اكسجين ، بيضه وحده ، زيت زيتون

وظائف المكونات :

الزيت زيتون : يعطي نعومه للشعر ويحميه انه مايتضرر من الاكسجين 

البيضه : عشان تعطي الشعر لمعه ومنظر صحي مايطلع محروق 

الكركم : يفتح لون الشعر 

النيسكافيه : يعطي لون للشعر البني ودرجاته 

الاكسجين : يفتح الشعر بحيث الكركم والنيسكافيه يمسك اللون حقهم بالشعر

نقاط مهمه :

اذا الشعر قصير يكفي علبه الى علبه وربع اكسجين  والاكسجين نوعين رقم ٦ و ٩

رقم ٦ يفتح بنسبة بسيطه ويعطي اللون البني رقم تسعه يفتح الشعر اكثر واكسجين ويلا هذا تلاقوه باي بقاله وصيدلية

طبعا انا في صبغتي استعملت علبتين واحد رقم ٦ وواحد رقم ٩

الكركم اذا مثلا حطينا ملعقتين كركم وملعقه نص نيسكافيه بيعطينا لون بني علي اشقر ونفس الشيء

لو حطينا ملعقتين نيسكافيه وملقعه ونص كركم يعطينا لون اغمق بني فاتح شوي 

المقادير تحطيها على حسب طول وكتافة شعرك ياتكثري او تقللي والمفترض تكون الخلطه سائله مو ثقيله

طريقتي فالتوزيع والمده :

اقسم شعري نصين القسم العلوي وارفعه وابدا اوزع من تحت اول شيء امسك خصله خصله

وامرر الصبغه عليها بعد ما اتاكد انه كل الخصل اخذت كميتها من الصبغه ارجع احط بيدين صبغه 

وابدا افرك الجذور وفروة الراس وارجع امسح الشعر وهكذا على كل الشعر 

فالنهاية قبل اغطي شعري ادنق واقلب راسي علي تحت وارجع اوزع صبغه مره اخيره عالجذور 

وانزل فيها لاخر اطراف الشعر وابدا امسح علي شعري كاني اتروش بعدين اخذ شباصه وارفعه

واغطي شعري باي كيسه او اي سفره اللي يعجبكم مدة الصبغه تتراوح بين ٦ الى ٨ ساعات 

فيه ناس فروات راسهم والاطراف مايمسك فيم اللون بسرعه فا يفضل ٨ ساعات 

انا شعري مسك اللون بسرعه فا خليتها ٦ ساعات وغسلت شعري عادي بشامبو سانسيلك عادي

وهذا مقطع من اليوتيوب نفس طريقة توزيعي للصبغه 

اضغط هنا

الاسئلة اللي قريتها منكم :

١- صابغه شعري حنا ينفع اصبغ الصبغه هاذي ؟ 

ماعرف لانو ماقد استعملت الحنا بحياتي فا ماعرف اذا بيمسك عليها اللون او لا 

٢- صابغه شعري اسود ينفع اصبغها ؟

لا ومستحيل تصبغ لانو صبع الاسود يفتح لازم يطيح اللون من نفسه واقل شيء سنتين

٣- هل الاكسجين او الصبغه بشكل عام ضررت شعرك ؟

لا ابدا لا الاكسجين ولاغيره ضرر شعري بالعكس الزيت زيتون ينعم شعري كثير

٤- هل ريحت شعرك واضحه من الصبغه ؟

لا ابدا مافي ريحة بيض يمكن شوي نيسكافيه بس اسبوع بالكثير وتروح الريحه 

٥- تصبغ الشعر الابيض ؟

لا لانو انا ندي كم شعره فيها شيب مانصبغت 

٦- هل يقلب لون الصبغه ويطيح ؟

يقلب لونها بمعني يتحول لا ، بس حالها حال اي صبغه انا من ثاني شهر بدا يطيح اللون

٧- ينفع يصبغوها اللي صابغين شعورهم صبغات عاديه ( بني اشقر الخ ) ؟

ينفع عادي وعلى حسب اساس لون صبغتك توازني الكركم والنيسكافيه اذا بتغمقي او تفتحي

٧- تبقع بالملابس واللي حوله بعد الشاور ؟

لا ابدا اذا نظفتو شعركم زين من اول مره ماعاد تشوفو شيء

وهاذي كانت تجربتي للمره الثانية مع الصبغه فيه ناس يقولو انو الجذور تكون افتح من الاطراف

انا اعتقد الصوره موضحه الحمدالله اللون موحد على كامل الشعر ولا سويت تكنيك معين 

انو ابدا فالاطراف عشان تصبغ قبل الجذور لا ابدا توزيعي عشوائي وشرحته فوق

اتمنى انه كان شرحي واضح وجاوبت على نفس الاسئلة اللي تكررت